​​
​លោក Trump និងនាយករដ្ឋមន្ត្រីអ៊ីស្រាអែល Netanyahu ពិភាក្សាគ្នាតាមទូរស័ព្ទអំពីបញ្ហារអ៊ីរ៉ង់
ដោយ - Fri,12 July 2019 (Time 11:45 AM)

យោងតាមការចុះផ្សាយរបស់ទីភ្នាក់ងារព័ត៌មានចិន Chinadaily នៅថ្ងៃទី១២ ខែកក្កដា ឆ្នាំ២០១៩ នេះបានឲ្យដឹងថា សេតវិមានបាននិយាយកាលពីថ្ងៃព្រហស្បតិ៍ថាប្រធានាធិបតីអាមេរិចលោកដូណាលត្រាំ បាននិយាយតាមទូរស័ព្ទជាមួយនាយករដ្ឋមន្ត្រីអ៊ីស្រាអែលបេនចាមីនណេតាន់ យ៉ាហ៊ូអំពីបញ្ហារប្រទេសអ៊ីរ៉ង់។

សេតវិមានបាននិយាយនៅក្នុងសេចក្តីថ្លែងការណ៍មួយថាមេដឹកនាំទាំងពីរបានពិភាក្សាពីកិច្ចសហប្រតិបត្តិការទ្វេភាគីនៅក្នុងការជំរុញផលប្រយោជន៍សន្តិសុខជាតិរួមគ្នារួមទាំងកិច្ចប្រឹងប្រែងដើម្បីទប់ស្កាត់សកម្មភាពមិនល្អរបស់អ៊ីរ៉ង់នៅក្នុងតំបន់។ ខណះប្រទេសអ៊ីរ៉ង់បានប្រកាសកាលពីថ្ងៃអាទិត្យថាខ្លួនកំពុងបង្កើនកម្រិតបរិមាណអ៊ុយរ៉ានីញ៉ូមលើសពីដែនកំណត់ដែលបានកំណត់នៅក្នុងកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ បន្ទាប់ពីការចាកចេញជាឯកតោភាគីរបស់ក្រុងវ៉ាស៊ីនតោនពីកតិកាសញ្ញានេះកាលពីជាងមួយឆ្នាំមុន។

អ៊ីរ៉ង់បាននិយាយមុននេះថាអឺរ៉ុបបានបរាជ័យក្នុងការចាត់វិធានការ "ជាក់ស្តែង" ដើម្បីធានាផលប្រយោជន៍សេដ្ឋកិច្ចរបស់អ៊ីរ៉ង់នៅក្រោមកិច្ចព្រមព្រៀងនេះ។

ណេតាន់យ៉ាហ៊ូដែលជាគូប្រជែង នៃកិច្ចព្រមព្រៀងនុយក្លេអ៊ែរឆ្នាំ ២០១៥ បានជំរុញឱ្យមេដឹកនាំអ៊ឺរ៉ុបដាក់ទណ្ឌកម្មលើអ៊ីរ៉ង់ដោយចោទប្រកាន់ថាការបង្កើនអ៊ុយរ៉ានីញ៉ូមនេះគឺដើម្បីផលិត "អាវុធនុយក្លេអ៊ែរ" ៕
ស.ស.អ.ក